Basta tambay, kadalasan, tamad na agad — walang ginagawa, walang magandang patutunguhan. Pero sa mga tulad kong naghahatid ng serbisyong totoo sa balita, isa ang pagtambay sa kailangan naming pag-aralan at paghandaan.

Minsan ngarag kami at kailangang mabilisang makapagbato ng balita. Minsan naman, may ilang oras na kailangan naming maghintay at tumambay! Yung tipong nabasa mo na lahat ng gusto mo, naubos mo na ang updates sa Twitter, Instagram at Facebook, na-chika mo na lahat ng kasama mo, ultimo guard at vendor!

With Hadji Rieta, Bam Alegre and Jay Sabale — With Hadji Rieta, Bam Alegre and Oscar Oida

With Bam Alegre, Oscar Oida and Mav Gonzales

Pero sa aking pagtambay, marami akong natututunan!

Pakikisama. Madalas, hindi ko kakilala ang mga kasama sa coverage! Kailangan maging pasensyoso at mapagkumbaba. Pangangalap ng impormasyon. Nakikihalubilo ako sa mga kapwa kong tambay na maraming alam. Pagsuyod ng pahayag. Minsan kailangang suyuin ang mga suspek para magsalita. Minsan nama’y napagsasabihan din sila na tipong daig pa ang na-biktima. Kailangang mapanuri; baka naman nagsasabi talaga ng totoo o baka lasing lang.

Nasanay na rin ako na pagsabayin ang pagiging extrovert at introvert. Isang oras, marami akong kausap. Mamaya, biglang may sarili na akong mundo kasi ubos na ang mga kwento ko.

Tambay sa paliparan habang naghihintay na dumating ang mga pulitiko o celebrity. Tambay sa mga opisina para sa presscon o briefing. Tambay sa newsroom habang naghihintay ma-check ang script. Tambay sa police station kung sakaling may krimen. Tambay sa mga monumento bago dumating ang mga ralyista.

Pangit maging tambay: nakakasawa, nakakaubos ng pasensya. Pero ganito talaga. Ito ang isa sa mga puhunan ko sa larangang aking pinili. Sa pagtambay, marami akong natututunan sa mga tao sa paligid ko — mga taong hindi ko naisip na masayang makakwentuhan.

Nakikita ko rin ang dedikasyon ng mga nakakasalamuha ko — mapa-kapwa ko tambay sa media, tindera at pulis. Kahit nga mga adik at kriminal! Dedicated silang mag-deny hanggang sa huli. Kaya huwag husgahan ang mga tambay! Kanya-kanya lang yan!